فورلان يحتفل ويُحيي آمال أوروغواي

خذ الرضا من الام .. وخذ الدعوة من الاخ ..

انا صابر .. ما بعرف هي امي سمتني صابر عإسم خالي اللي استشهد متل ما قالت .. ولا عشان اكون عالحياة وغلبتها صابر ..
امي .. انا الولد الاخير لامي .. عندي اخت وحدة اريج .. واخين رامي وكمال .. وانا الرابع والاخير .. جيت عالدنيا ما بعرف ابوي .. كان يقولولي انه مسافر .. ولليوم وهو مسافر .. وبس كبرت فهمت انه كان هاجرنا وتاركنا وما بعرف عنا اشي وانا ما بعرف الا انه اسمه اسامة .. واني بشبهو ..
كانت امي توخذني معها عالشغل .. ريحة ادوات التنظيف والديتول لليوم بمناخيري .. كنت اقعد عجنب ما استرجي اتحرك .. اشوف ولاد الناس وهي تلعب وتحوس .. وانا قاعد عالدرج بستنى امي تا تخلص تنظيف عشان نروّح .. تعودت اني البس اواعي ملبوسة .. واكمل باقي الاكل من ورا الناس .. تعودت اشوف امي بتتبهدل .. واشوف الدمعة محبوسة بعيونها .. اتعودت كمان اشوف امي متهمينها انها حرمية .. وهي تترجى وتقسم انها ما اخذت اشي .. واتعودت كمان اشوف الناس يقولولها اسفين ظلمناكي .. ويروحوها عدارها مع اكم من قطعة اواعي
ومصاري بزيادة .. عشان يراضوها ..
اتعودت اشوف امي بتحط الاواعي و بتولع فيها النار .. وكنت اضل اعيط بدي الاواعي لانها جديدة.. وتبلش امي تضرب فيي بالحفاي البلاستيك .. من القهر والوجع .. بس احنا الوحيدين اللي كانت امي تقدر تبهدلنا بهالدنيا ..
اريج ورامي .. امي وابوي التانين .. اريج كانت تحممنا انا واخواني مع بعض .. بنفس الطشط ونفس التنكة ،، وكنا نضل لابسين الكلاسين مستحيين منها .. واريج كانت تحضر الهريسة لرامي عشان يطلع يبعيها عالعرباي .. وانا وكمال نضل نعيط بدنا نروح معاه ما بدي اروح اشم الديتول واقعد عالدرج ..وادوق قتلة بنفس الشبشب واروح وانا واعيط ..
كبرنا وكبرت امي .. درسنا بمدارس الوكالة .. وكل الطلاب مقملين وحالقين عالصفر .. الحلو كان انه كلنا بلاطينا عليها رقعة .. وكلنا شناتينا من السنة الماضية ..
رامي كان عبقري بالمدرسة وكمال كمان .. بس انا كنت تيس .. اتضل اريج ساعة اتدرس فيي بالاخر تضربني وترمي الكتاب .. وتحلف يمين انها ما تدرسني .. بس ترد تمسك الكتاب ونعيد من اول ..
كبرت وصار دوري امسك عرباية رامي وابيع هريسة .. كتير اتهموني اني نصاب .. وكتير وقفو داقو الهريسة وراحو وكتير اشوف ناس ماخذين ولادهم مشاوير بالسيارة يطعموهم هريسة وانا قاعد ادوق حم الصيف .. وبرد الشتا .. شغل امي برى الدار .. دراسة رامي .. شغل اريج جوا الدار ..وقفتي عالعرباي .. مقاتلاتي انا وكمال .. لمتنا حوالين الصوبا نسخن خبز و نتعشى .. الاكل البايت .. العدس .. المجدرة خمس ايام بالاسبوع .. حياة كانت صعبة .. بس بتمنى اقدر ارجع يوم واحد منها ..
اتخرج رامي واشتغل .. وكمال كان بالجامعة .. وانا بالعافية خلصت توجيهي .. وطول هالوقت امي تشتغل .. واريج تزوجت ابن حلال .. ابن جيرانا مجاهد ،، وما كان يمنعها ابداً تيجي عنا وتساعد امي ..
بعد ما خلص كمال واشتغل .. صار الوقت انها امي تقعد وتتريح .. تتعزز ببيتها .. وانا كنت بالجامعة وبشتغل كمان بمحل قماش عند ابو محمد .. زلمة شرواكم بالخير ابن حلال كان ما عنده محمد ولا حمدة .. كان يعتبرني ابنه .. وكثير كان يساعدني مادياً .. وقالي جيزتي عليه .. وفعلا تزوجو اخواني الحمدلله .. وسكنو فوق امي .. وانا ضليت اشتغل بمحل القماش حتى بعد ما خلصت جامعة .. وضعنا المادي صار يتحسن .. عالقليلة قادرين نستت امي و نساعد اريج ومجاهد ..
وتزوجت رنا .. وسكنت فوق امي قبال دار كمال ..
وكنا كتير نسهر عندها .. ونضحكها .. ونزكزها بشبشبها البلاستيك اللي علم على جلودنا ..
امي .. ما قدرنا نرجعلك ماضييكي اللي راح .. ما قدرنا نسد جوعك وتعبك وقتها .. واليوم بس بقدر ادعيلك بالرحمة .. واقلك انك ربيتينا عالقناعة والرضا والصبر .. واقلك انها اريج بعيوننا يما .. والله مشتاقلك يما .. والله نفسي ارد اشوفك واحطك عراسي يما .. والله انا اسف يما اسف ازا زعلتك وقهرتك مع هالدنيا يما .. الفقر مش عيب يما .. العيب تكون فقير وجوعان .. وانت سديتي جوعنا بعرق جبينك وكرامتك يما .. دفعتي عمرك عشاننا يما .. الله يرحمك ويصبرنا عفراقك يا غالية ..

‫#‏بتفلسف_عليكم‬